admin “真系柴鱼命，唔打唔成器”，隔离嘅老伯形容佢嘅孙仔，话佢顽皮捣蛋，成日要大人动粗先制得住。广州人讲嘅“柴鱼命”，来源于一种家阵稍为少见嘅海味，就系柴鱼。因为佢喺好硬嘅干货，煮之前，需要用刀甚至锤仔捶打，将佢整碎成丝状。
偶然喺超市见到有柴鱼卖，勾起咗旧阵时嘅记忆。上世纪八十年代嘅广东，物质匮乏，而且运输技术亦落后，好难买到真正生猛嘅海鲜，所以柴鱼作为干货嘅一种，就成咗最常见嘅海产品之一。柴鱼其实系寒带海域嘅一种鳕鱼，晒干制成嘅，因为佢晒干后，就好似一条条木柴咁，广州话就叫佢柴鱼。
柴鱼可以煲汤或者煲粥，譬如柴鱼花生粥，就系广州人中意嘅一种家常美食。佢需要用老火慢慢煲，柴鱼煲熟后，一丝一缕仍然保持住鱼肉干嘅质感，佢带微微嘅韧性，好有嚼头，搭配花生嘅松脆，成煲汤散发出独特嘅清香，隔篱屋都闻得到。据讲，柴鱼花生粥仲有健脾胃、益阴血嘅功效，所以特别啱老人同细路食。
时代唔同，时下海产品嘅供应，已经今非昔比，加上养殖业嘅发展，新鲜海鲜、河鲜已经可以大量供应，所以柴鱼亦逐渐推出市场主流视线，喺市场、超市都比较少见。不过佢嘅味道，仲保留喺好多街坊嘅记忆之中。
◎闻歌 媒体人